आठौँ संस्करणको बागमती गोल्डकपमा बागमती युथको बिजयी सुरुवात

मकवानपुरको बागमती गाउँपालिकामा आठौँ संस्करणको बागमती गोल्डकप राष्ट्रिय फुटबल प्रतियोगिता बिहीवारदेखि सुरु भएको छ। बागमती–४ स्थित सहिद स्मृति रंगशालामा सम्पन्न उद्घाटन खेलमा सर्लाहीको बागमती युथ क्लबले आयोजक बागमती खेलकुद विकास समितिलाई ३–० गोलले पराजित गर्दै विजयी सुरुवात गरेको हो।

बागमती युथको जितमा सुजन गुरुङले ३१औँ मिनेटमा पहिलो गोल गरेका थिए भने राजु लोले ६८औँ मिनेटमा दोस्रो गोल थपे। त्यसपछि अनिष महर्जनले ७१औँ मिनेटमा तेस्रो गोल गर्दै जित सुनिश्चित गरे। खेलको ‘प्लेयर अफ द म्याच’ सुजन गुरुङ घोषित भए र उनले नगद १० हजार रुपैयाँ प्राप्त गरे। अब बागमती युथले सेमिफाइनल प्रवेशका लागि सातौँ संस्करणका विजेता चर्च ब्वाइज युनाइटेड, ललितपुरसँग प्रतिस्पर्धा गर्नेछ। चर्च ब्वाइजले समूह ‘ए’ बाट बाई पाएको छ।

प्रतियोगिता अन्तर्गत बैशाख १८ गते त्रिभुवन आर्मी क्लब, काठमाडौं र बाराको नव जनजागृति क्लबबीच खेल हुनेछ। त्यस्तै, बैशाख १९ गते एपीएफ क्लब र चित्लाङ एफसी, काठमाडौंबीच प्रतिस्पर्धा हुनेछ। बैशाख २१ गते फ्रेन्ड्स क्लब, ललितपुर र प्लानिङ ब्वाइज युनाइटेडबीच खेल हुनेछ भने बैशाख २२ गते मछिन्द्र क्लबले एपीएफ र चित्लाङबीचको विजेतासँग प्रतिस्पर्धा गर्नेछ। सेमिफाइनल खेलहरू बैशाख २३ र २४ गते हुनेछन् भने फाइनल खेल बैशाख २६ गतेका लागि तय गरिएको छ।

आयोजकसहित कुल १० टोली सहभागी रहेको प्रतियोगिताको विजेताले १० लाख रुपैयाँ र उपविजेताले ५ लाख रुपैयाँ पुरस्कार प्राप्त गर्नेछन्। त्यस्तै, प्रतियोगिताको सर्वोत्कृष्ट खेलाडीलाई १ लाख १ हजार रुपैयाँ, विधागत उत्कृष्ट खेलाडीहरूलाई जनही २५ हजार रुपैयाँ र प्रत्येक खेलका म्यान अफ द म्याचलाई १० हजार रुपैयाँ प्रदान गरिनेछ।

प्रतियोगिताको उद्घाटन बागमती खेलकुद विकास समितिका अध्यक्ष रहर सिं थिङको सभाध्यक्षता तथा बागमती प्रदेश सभा सदस्य कुमारी मोक्तानको प्रमुख आतिथ्यतामा सम्पन्न भएको थियो। कार्यक्रममा प्रदेश सभा सदस्य प्रेम बहादुर पुलामी, बागमती गाउँपालिकाका अध्यक्ष सर्केश घलान, प्रमुख प्रशासकीय अधिकृत ओम बहादुर दर्जी तथा एन्फा केन्द्रीय सदस्य टीकाराम लामा लगायतको उपस्थिति रहेको थियो।