माझगाउँमा पोखरीको माछा मर्दा डेढलाखको क्षति

मकवानपुरको बागमती गाउँपालिका -१ माझगाउँमा माछा पोखरीका सबै माछा मरेर नष्ट भएको छ । शुक्रबार माझगाउँस्थित धन घिसिङले पोखरीमा पालेको माछा मरेर क्षति भएको हो ।
बिहान ६ बजेको समयमा घर भन्दा २ सय मिटर पूर्व आफ्नै पोखरीमा माछालाई दाना हाल्न जाँदा सबै माछा मरेको भेटिएको थियो । पोखरीमा विषादी हालेका कारण सम्पूर्ण माछा मरेको खबर प्राप्त भएपछि प्रहरी चौकी राईगाउँबाट प्रहरी टोली खटिएको थियो । पोखरीमा कसले र किन विष हालेको भन्ने खुल्न नसकेको र अनुसन्धान भइरहेको प्रहरीले जनाएको छ । साना ठूला सबै माछा मरेको र डेढ लाख रुपैयाँ बराबरको माछा मरेको बताएको छ । बागमती गाउँपालिकाबाट पशु विज्ञसहितको टोली खटेर जाँच गर्दा पोखरीमा क्षमताभन्दा धेरै माछाहरु हालेर पालेका कारण अक्सिजनको कमी भएको र मरेको भन्ने बताइएको छ ।