Mero Logo

मेनुकाको स्वरमा ‘सलार’को गीत रिलिज

साउथ सुपरस्टार प्रभास अभिनीत फिल्म ‘सलार’मा नेपालकी गायिका मेनुका पौडेलको पार्श्व गायन रहेको गीत सार्वजनिक भएको छ । बुधबार साँझ निर्माण कम्पनी हम्बेल फिल्म्सको युट्युब च्यानलमा सार्वजनिक भएको ‘सूरज ही छाँव बनके’ बोलको हिन्दी संस्करणको गीतमा उनको स्वर समावेश छ । मेनुकाले गत हप्ता मात्रै यो गीत मुम्बईस्थित एक स्टुडियोमा रेकर्ड गराएकी थिइन् ।

गीतमा रवि बसरुरको संगीत रहेको छ भने रिया मुर्खजीको शब्द रचना छ । युट्युबमा सार्वजनिक गीतमा फिल्मभित्रका चल/अचल दृश्यहरु समावेश छन् । मेनुकाले पहिलोपटक भारतीय फिल्मको गीतमा पार्श्व गायनको मौका पाएकी हुन् । यसलाई उनले आफ्नो गायन करिअरको टर्निङ पोइन्ट मानेकी छन् । अहिले उनी ‘इन्डियन आइडल’मा आफ्नो सानदार प्रस्तुतीका कारण चर्चामा छिन् ।

‘इन्डियन आइडल’को गत आइतबारको एपिसोडमा उनले स्टुडियो पुगेर ‘सलार’को गीत गाएको अंश प्राथमिकताका साथ प्रशारण गरिएको थियो । र, उक्त शोको निर्णायकमध्येकी श्रेया घोषालले उठेर बधाई दिएकी थिइन् । ‘इन्डियन आइडल’को ‘टप १४’सम्म पुगिसकेकी उनलाई उपाधिको हकदारको रुपमा हेरिएको छ । मेनुका दृष्टिविहीनहरुका लागि समेत प्रेरणाको स्रोत बनेकी छन् ।

प्रतिक्रिया