माघ १७ ,हेटौंडा ,पदमपोखरी अस्पताल हेटौंडाको आयोजनामा हेटौंडा १३, वनस्पतिमा स्वास्थ्य शिविर सम्पन्न भएको छ ।
मुख्यमन्त्री जनता स्वास्थ्य परीक्षण कार्यक्रम अन्तर्गत आज शिविर आयोजना गरिएको अस्पतालका सिनियर अहेव शेर बहादुर ब्लोनले जानकारी दिनुभयो ।
वनस्पतिको सामुदायिक प्रहरी बिटको प्राङ्गणमा भएको स्वास्थ्य परीक्षण कार्यक्रममा विभिन्न प्रकारका ७१ जना बिरामीहरुको स्वास्थ्य परीक्षण गरिएको ब्लोनले जानकारी दिनुभयो ।
हेटौंडा उपमहानगरपालिका वडा नम्बर १३ का अध्यक्ष पेम्बा लामाको अध्यक्षतामा भएको कार्यक्रममा ३० वर्ष उमेर पुगेका र कहिलैपनि स्वास्थ्य संस्थामा गइ कुनै पनि परीक्षण नगरेका व्यक्तिहरुको स्वास्थ्य परीक्षण गरिएको उहाँले बताउनुभयो ।
शिविरमा सिनियर अहेव शेर बहादुर ब्लोन, पूर्ण विक्रम अधिकारी, स्टाफ नर्स वास्नामाया स्याङ्तान लगायतले स्वास्थ्य परीक्षण गर्नुभएको थियो । परीक्षणका क्रममा जटिल अवस्थाका १२ जना बिरामीको पहिचान गरि हेटौंडा अस्पताल रेफर गरिएको सिनियर अहेव ब्लोनले जानकारी दिनुभयो । उहाँका अनुसार रेफर गरिएका बिरामीको हेटौंडा अस्पतालमा निशुल्क उपचार हुनेछ ।
आगामी दिनमा हरेक शुक्रबार पदमपोखरी अस्पतालमा निशुल्क परीक्षण गरिने उहाँले बताउनु भयो । कार्यक्रममा समाजसेवी अशोक डिमडुङ, वडा सदस्य दावा लामा, सानुमाया नेपाली, स्वास्थ स्वयमसेविका मीना स्याङ्तानलगायतको उपस्थिति रहेको थियोे ।
