नेपाल पहिलो पटक टेष्ट राष्ट्रसँग टी–२० शृंखलामा भिड्ने, वेस्ट इन्डिजसँग तीन खेल युएईमा हुने
काठमाडौं — नेपाली राष्ट्रिय पुरुष क्रिकेट टोलीले आफ्नो इतिहासमै पहिलो पटक टेष्ट राष्ट्र वेस्ट इन्डिजसँग टी–२० अन्तर्राष्ट्रिय क्रिकेट शृंखला खेल्ने भएको छ। नेपाल क्रिकेट संघ (क्यान) का अनुसार तीन खेलको यो बहुप्रतीक्षित शृंखला आगामी सेप्टेम्बर महिनामा युएईको सारजहा क्रिकेट मैदानमा आयोजना हुनेछ।
क्यानले जारी गरेको सूचनाअनुसार, नेपाल र वेस्ट इन्डिजबीचको पहिलो खेल सेप्टेम्बर २७ मा, दोस्रो खेल सेप्टेम्बर २८ मा र अन्तिम तथा तेस्रो खेल सेप्टेम्बर ३० मा खेलिनेछ।
नेपालले अहिलेसम्म कुनै पनि टेष्ट राष्ट्रसँग टी–२० अन्तर्राष्ट्रिय शृंखला खेलेको थिएन। यस्तो शृंखलाले नेपाली क्रिकेटको अन्तर्राष्ट्रिय स्तरमा उचाइ बढाउने विश्वास गरिएको छ। वेस्ट इन्डिज जस्तो दोहोरो टी–२० विश्वकप विजेता टिमसँगको खेल नेपालका खेलाडीहरूका लागि ठूलो अवसर र चुनौती दुवै हुनेछ।
नेपाल क्रिकेट संघले यस शृंखलाले नेपाली क्रिकेटप्रति बढ्दो अन्तर्राष्ट्रिय चासो र सम्मानलाई प्रतिबिम्बित गरेको बताएको छ। साथै, यसले आगामी टी–२० विश्वकप तयारीलाई समेत मजबुत बनाउने अपेक्षा गरिएको छ।
क्रिकेटप्रेमीहरूबीच उत्साहजनक चर्चा सुरु भइसकेको छ र अब सबैको नजर सेप्टेम्बरमा युएईमा हुने ऐतिहासिक शृंखलामा केन्द्रित हुने देखिन्छ।