बागमती।मकवानपुरको बागमतीमा पौडी खेल्न गएकी १३ वर्षीया बालिकाको चिरुवा खोलामा डुबेर मृत्यु भएको छ। मृत्यु हुनेमा ललितपुर घर भई हाल मामाघरमा बस्दै आएका सन्तोष तामाङकी छोरी रुबिना तामाङ रहेकी छिन् ।
मकवानपुर प्रहरीका अनुसार बागमती गाउँपालिका- १ हात्तीढुङ्गास्थित चिरुवा खोलामा डुबेर उनको मृत्यु भएको हो। रुबिनासहित तीनजना चिरुवा खोलामा नुहाउने क्रममा रुबिना डुबेको भनी निजकी बहिनी यलिना तामाङले घरमा खबर गरेकी थिइन् ।
खबर पाउनासाथ हजुरबुबा दुखुवा राईसहित छिमेकीहरूले रुबिनालाई उद्धार गरी उपचारका लागि बागमती -४ झुरझुरेस्थित सान्भी हेल्थ क्लिनिकमा पुर्याएको थियो ।तर रुबिनालाई डाक्टरले मृत घोषणा गरेको थियो। मृतक रुबिनाको शव पोस्टमार्टमका लागि हेटौँडा अस्पतालमा राखिएको र घटनाबारे अनुसन्धान थालिएको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जानकारी दिए ।
