कान्तिपुर मिडिया ग्रुपमा अध्यक्ष कैलाश सिरोहिया पक्राउ

कान्तिपुर मिडिया ग्रुपका अध्यक्ष कैलाश सिरोहियालाई प्रहरीले काठमाडौंको थापाथलीस्थित कार्यालयबाट पक्राउ गरेको छ ।

नेपाल प्रहरीको उपत्यका अपराध अनुसन्धान ब्यूरोले दोहोरो नागरिकता प्रयोग गरेको आरोपमा उनलाई पक्राउ गरेको हो ।
यसअघि धनुषा जिल्ला अदालतले उनलाई पक्राउ पुर्जी जारी गरेको थियो । सिरोहियालाई पक्राउ गर्न उपत्यका अपराध अनुसन्धान कार्यालयका प्रमुख एसएसपी सानुराम भट्टराई र एसपी रवीन्द्र रेग्मी कान्तिपुर कार्यालय थापाथली पुगेका थिए ।

सिरोहिया विरुद्ध सर्लाहीका इन्द्रजित महतोले जिल्ला प्रहरी कार्यालय, धनुषामा १६ वैशाख २०८१ मा किटानी जाहेरी दिएका थिए । जाहेरीमा सिरोहियाले फरक–फरक नम्बरका नागरिकताहरु प्रयोग गरिरहेको भन्दै नागरिकता ऐन, २०६३ अनुसारको कसूरमा छानबिन गर्न माग गरिएको थियो ।