हरिहरपुरगढीको झ्याडीमा १ महिने सिलाई कटाई तालिमको उद्घाटन

सिन्धुली, हरिहरपुरगढी — सिन्धुलीको हरिहरपुरगढी गाउँपालिका–४ झ्याडीमा उपकार सामुदायिक सिकाइ केन्द्रको आयोजनामा महिलाहरूका लागि एकमहिने सिलाई–कटाई तालिमको उद्घाटन गरिएको छ।
कार्यक्रममा वडा नं. ४ का वडा अध्यक्ष तथा गाउँपालिका प्रवक्ता कमल कुमार राई प्रमुख अतिथिका रूपमा उपस्थित हुनुहुन्थ्यो। साथै मावि महेन्द्र झ्याडीका प्रधानाध्यापक रेणु प्रसाद देवकोटा, संस्थाका सदस्यहरू अन्जु राई, अन्जनी राई, लिला बहादुर बम्जन लगायतको उपस्थिति रहेको थियो।

उद्घाटन कार्यक्रममा बोल्दै वडा अध्यक्ष राईले तालिमले महिलाहरूमा सीप विकास गरी आत्मनिर्भर बन्न र आर्थिक आयआर्जनमा सहयोग पुग्ने विश्वास व्यक्त गर्नुभयो।
एक महिनासम्म सञ्चालन हुने तालिममा १० जना महिलाको सहभागिता रहने जनाइएको छ। सिकाइ केन्द्रका अध्यक्ष हिम्मत बहादुर राईको अध्यक्षतामा सम्पन्न कार्यक्रमको सञ्चालन भेष बहादुर राईले गर्नुभएको थियो।
कार्यक्रममा स्थानीय महिलाहरूको उल्लेखनीय सहभागिता रहेको थियो।