हरिहरपुरगढी पान्तलेमा शारीरिक अपाङ्गता पहिचान तथा स्वास्थ्य परीक्षण घुम्ती शिविर सञ्चालन

सिन्धुलीको हरिहरपुरगढी गाउँपालिका वडा नं. ८ पान्तलेमा शारीरिक अपाङ्गता पहिचान तथा स्वास्थ्य परीक्षण घुम्ती शिविर सञ्चालन गरिएको छ ।

हरिहरपुरगढी गाउँपालिका र विकलाङ्ग मित्र समूह/अपाङ्गता बाल अस्पताल तथा पुनस्र्थापना केन्द्र (एचआरडिसी), बनेपा, काभ्रेपलाञ्चोकको संयुक्त आयोजनामा आज शिविर सम्पन्न भएको हो ।
शिविर वडा नम्बर ८ का वडा अध्यक्ष धनबहादुर मोक्तानको अध्यक्षता तथा हरिहरपुरगढी गाउँपालिकाका अध्यक्ष वज्रध्वज वाइबाको प्रमुख आतिथ्यता तथा उपाध्यक्ष चेखबहादुर थिङको उपस्थितीमा शिविरको उद्घाटन गरिएको थियो ।

हरिहरपुरगढी गाउँपालिकाका अध्यक्ष वज्रध्वज वाइबाले शारीरिक अपाङ्गता भएका बालबालिका तथा व्यक्तिहरुको स्वास्थ्य परीक्षण तथा उनीहरुको पुनस्र्थापना गर्ने उद्देश्यले घुम्ती शिविर सञ्चालन गरिएको बताउनुभयो । उहाँले गाउँपालिकाले यसअघि विभिन्न स्थानमा स्वास्थ्य शिविर आयोजना गरेको र अपाङ्गता भएकाहरुका केन्द्रित गरेर यो शिविर आयोजना गरिएको जानकारी दिनुभयो । अपाङ्गता भएकोहरुको स्वास्थ्य र पुनर्स्थापना एचआरडिसीले गर्दै आएको काम उदाहरणीय भएको भन्दै उहाँले प्रशंसा गर्नुभयो ।

यसअघि वडा नं. ६, ७ र ८ निःशुल्क स्वास्थ्य शिविर आयोजना गरी १ हजारभन्दा बढी बिरामीलाई सेवा पु¥याएको उहाँले बताउनुभयो । भर्खरै सम्पन्न गरेको निःशुल्क दन्त तथा आँखा शिविर अत्यन्त प्रभावकारी भएको उल्लेख गर्नुहुँदै उहाँले सरकारले दिने स्वास्थ्य सेवामा विश्वास गर्न आग्रह गर्नुभयो । उक्त शिविरमा वर्षौंदेखि आँखा देख्ने व्यक्तिहरु उपचारपछि देख्ने भएको चर्चा गर्नुहुँदै उहाँले वास्तविक भगवान् शिलामा होइन मान्छेसँगै हुन्छ भन्ने त्यसबाट प्रमाणित भएको बताउनुभयो ।

स्थानीय सरकार प्रभावकारी स्वास्थ्य सेवा दिन लागिपरेको तर कतिपय नकारात्मक विचार भएका व्यक्तिहरुका कारण सरकारले गरिदिने उपचारमा अविश्वास गर्ने प्रवृत्ति समाजमा रहेको उहाँको भनाइ छ । यस्तो प्रवृत्तिका कारण उपचार गराउनै पर्ने बिरामीसमेत छुट्ने गरेकोले त्यस्तो विकृत सोच हटाउनुपर्नेमा उहाँले जोड दिनुभयो ।

गाउँपालिकाका उपाध्यक्ष चेखबहादुर थिङले जन्मँदै अपाङ्गता भएका र पछि दुर्घट्ना वा कुनै कारण अपाङ्गता हुन पुगेका बालबालिका तथा व्यक्तिहरुलाई एचआरडिसीले पुर्याउदै आएको मानवीय सेवा प्रशंसायोग्य भएको बताउनुभयो । उहाँले फरक क्षमता भएका बालबालिका तथा व्यक्तिहरुको भविष्य सहज बनाउन गाउँपालिकाले एचआरडिसीसँग सहकार्य गरेर शिविर आयोजना गरिएको बताउनुभयो ।