बागमतीको विकट भिम्बादमा पुग्यो खानेपानी सुविधा, स्थानीय हर्षित
बागमतीः मकवानपुरको बागमती गाउँपालिका वडा नम्बर २ स्थित विकट गाउँ भिम्बादमा खानेपानीको सुविधा पुगेको छ । शुक्रबार गाउँपालिकाका अध्यक्ष सर्केश घलानले एक कार्यक्रमका बीच भिम्बादमा नवनिर्मित खानेपानी योजनाको उद्घाटन गर्नुभएको हो ।
खानेपानीको उद्घाटन गर्नुहुँदै अध्यक्ष घलानले खानेपानी सुविधाको ठिक ढङ्गले संरक्षण गर्न र उचित सदुपयोग गर्न आग्रह गर्नुभयो । गाउँपालिकाले गरेको सहयोगमा मिहेनत गरेर खानेपानी ल्याउन सफल भएको भन्दै उहाँले योजना समितिलाई धन्यवाद दिनुभयो । राज्यले दिएको सुविधा उपयोग गरेर गाउँलाई नमुना बनाउनुपर्ने उहाँको भनाई छ । उहाँले उक्त क्षेत्रमा रहेका अन्य समस्याहरुलाई सम्बोधन गर्न गाउँपालिकाको तर्फबाट आवश्यक सहयोग गर्ने र सबै जना श्रमदानमा जोडेर यसलाई पुरा गर्नुपर्ने बताउनुभयो । उहाँले विकास निर्माणमा सरकारको मात्र मुख हेरेर नहुने भन्दै सबै जना श्रममा जोड्नुपर्ने बताउनुभयो ।
यस्तै खानेपानी योजना समितिका अध्यक्ष खिल बहादुर ठाडा मगरले भीर पाखाहुँदै कष्ट गरेर खानेपानी ल्याउन सफल भएको बताउनुभयो । ‘एक घण्टाभन्दा बढी समय लगाएर तलबाट बोकेर खानेपानी ल्याउनुपर्ने अवस्थाबाट मुक्त भएका छौं । स्थानीय सरकारले घरघरमा खानेपानी सुविधाका लागि बजेट उपलब्ध गरायो अनि हामीले काम गर्यौँ आज पानी आएको छ ।’ उहाँले भन्नुभयो ।
खानेपानी योजनाका लागि गाउँपालिकाले चालु आर्थिक वर्षमा ५५ लाख रुपैयाँ बजेट विनियोजन गरिएको थियो । पानीको मुहानबाट ३ किलोमिटरभन्दा बढी दुरीमा ट्याङकी निर्माण भएको छ । खानेपानी योजनाबाट २९ घरधुरी लाभन्वित भएका छन् ।
कार्यक्रममा बागमती–२ का वडाध्यक्ष जनक पहरी, ४ नम्बर वडाध्यक्ष दन्तलाल माझी, २ नम्बरका वडा सदस्यहरु राजु तितुङ, कृष्ण बहादुर श्रेष्ठ, नेकपा माओवादी केन्द्र बागमती–२ कमिटीका इन्चार्ज जीवन पहरी, वडा कमिटी अध्यक्ष राजकुमार सेन्चुरी लगायत स्थानीयहरुको उपस्थिति रहेको थियो ।