रुकुम पश्चिमको आठविसकोटमा बाढीले बगाउँदा तीन बालबालिकाको मृत्यु, एकजना बेपत्ता

रुकुमपश्चिममा हिजो राति आएको बाढीले घर बगाउँदा पुरिएका तीन बालिकाको शव निकालिएको छ । रुकुमपश्चिमम आठविसकोट नगरपालिका १२ को झिन्चौर बगरमा झिन्चौर खोलामा आएको बाढीले घर बगाउँदा तीन बालिका पुरिएको हो ।

घर बाढीले बगाउँदा पुरिएर मृत्यु भएका १० वर्षीया हितमाया पुन, आठ वर्षीया धनसा पुन र चार वर्षीया मनिषा सार्कीको शव निकालिएको प्रहरीले जनाएको छ ।
बाढीले घर बगाउँदा बेपत्ता भएका ४० वर्षीय डिल्लीबहादुर बुढाथोकीको खोजी भइरहेको छ । लेदोसहितको बाढीले घर पुरिएपछि डोजर लगाएर लेदो हटाउने तयारी भइरहेको नगर प्रमुख रबी केसीले बताउनुभयो।
बाढीमा परेर घाइते भएका सात जनाको आठविसकोट नगर अस्पतालमा उपचार भइरहेको छ घाइते हुनेहरुमा स्थानीय १२ वर्षीय विनय सार्की, २२ वर्षीया मनिषा पुन, २९ वर्षीय जनक खत्री, छ वर्षीया मनसरी पुन, चार वर्षीय मेक्सन पुन, २८ वर्षीया धनमाया पुन र ६५ वर्षीया कल्पना कामी रहेका छन ।