माओवादी केन्द्र हरिहरपुरगढी गाउँ कमिटीको प्रथम बैठक सम्पन्न

नेपाल कम्युनिस्ट पार्टी (माओवादी केन्द्र) हरिहरपुरगढी गाउँ कमिटीको प्रथम बैठक आज आइतबार सम्पन्न भएको छ । गाउँ कमिटीका अध्यक्ष जितबहादुर ठाडाको अध्यक्षता तथा पार्टीका सिन्धुली जिल्ला इञ्चार्ज बुद्धिमान माझीको प्रमुख आतिथ्यतामा बैठक सम्पन्न भएको हो ।
बैठकलाई सम्बोधन गर्नुहुँदै जिल्ला इन्चार्ज माझीले माघ महिनाभित्रमा पार्टीको आन्तरिक सुदृढीकरणसहित बैठक, भेला सभा, सम्मेलन सम्पन्न सरिसक्ने बताउनुभयो । उहाँले हरिहरपुरगढीमा जनप्रतिनिधि र पार्टीबीच सुमधुर सम्बन्ध रहेको भन्नुहुँदै प्रशंसा गर्नुभयो ।
“पार्टी मुख्य हो, जनप्रतिनिधि सहायक । किनकि त्यो मोर्चा हो । सरकारको मोर्चाबाट जनतालाई सेवा प्रवाह गर्ने हो । विकासको माध्यमबाट नै संगठनलाई सुदृढीकरण गर्नुपर्छ,” उहाँले भन्नुभयो ।
जनप्रतिनिधि र पार्टीबीचको सम्बन्ध एकदमै अभिभाज्य रहेको इञ्चार्ज माझीको भनाइ छ । “यी दुवैले एकले अर्काेलाई पूरक काम गर्छ । पार्टीको निम्ति जनप्रतिनिधि बाधक हुन्छ भन्नु भ्रममात्रै हो,” उहाँले थप्नुभयो ।
कार्यक्रममा माओवादी केन्द्रका बामगती प्रदेशका सहसचिव प्रकाश श्रेष्ठले कम्युनिस्टहरुले बनाउन खोजेको राज्यसत्ता समाजवादी राज्यसत्ता रहेको बताउनुभयो । कम्युनिस्ट आन्दोलनको सात दशकको एउटा अध्याय सकियो । जुन सामन्तवादविरुद्धको लडाइँ अन्त्य गरेर अब पुँजीवादविरुद्धको लडाइँ सुरु भएको श्रेष्ठले बताउनुभयो ।
कम्युनिस्टका पछिल्लो पुस्ताहरु भौतिकवादीभन्दा बढी आध्यात्मकवादतर्फ बढी केन्द्रित भइरहेको श्रेष्ठको भनाइ छ । त्यसैका लागि पनि कम्युनिस्ट प्रशिक्षण आवश्यक रहेको बताउनुभयो ।
कार्यक्रममा बागमती प्रदेश सदस्य तथा गाउँपालिका इञ्चार्ज ज्ञानबहादुर राई, बागमती प्रदेश सदस्य बाबुराम राईलगायतको उपस्थिति रहको थियो ।